ບາງຄວາມຄິດເຫັນຂອງຜູ້ສະໝັກຮັບເລືອກຕັ້ງ
ສສຊ ຊຸດທີ IX ປະຈໍາເຂດເລືອກຕັ້ງທີ 12
ຂປລ. ໃນໂອກາດລົງໂຄສະນາຫາສຽງ ຂອງຜູ້ສະໝັກຮັບເລືອກຕັ້ງ ສສຊ ຊຸດທີ IX ປະຈໍາເຂດເລືອກຕັ້ງທີ 12 ແຂວງຄໍາມ່ວນ ໂດຍສະເພາະໃນການລົງເຄື່ອນໄຫວຢູ່ເມືອງໄຊບົວທອງ ໃນວັນທີ 15 ກຸມພາ ຜ່ານມາ, ທ່ານ ທະນົງສິນ ກັນລະຍາ ຜູ້ສະໝັກຮັບເລືອກຕັ້ງ ສສຊ ຊຸດທີ IX ນໍ້າເບີ 7 ໄດ້ສະແດງຄວາມຄິດເຫັນຜ່ານສື່ມວນຊົນຂອງແຂວງວ່າ: ເປັນຄັ້ງທຳອິດທີ່ຕົນເອງສະໝັກຮັບເລືອກຕັ້ງ ແລະ ເປັນຜູ້ທີ່ໄດ້ຮັບຄັດເລືອກເປັນຕົວແທນຂອງສະພາການຄ້າ ແລະ ອຸດສາຫະກຳ, ຂ້າພະເຈົ້າມີຄວາມພູມໃຈເປັນຢ່າງຍິ່ງ ທີ່ຈະປະຕິບັດ ແລະ ຮັບໃຊ້ປະຊາຊົນດ້ວຍສະຕິປັນຍາ, ດ້ວຍຄວາມຄວາມຮູ້ ແລະ ປະສົບການຕ່າງໆ ໃນການບໍລິຫານຮ່ວມມືກັບຫລາຍພາກສ່ວນ ເພື່ອເຮັດແນວໃດໃຫ້ຊີວິດການເປັນຢູ່ຂອງປະຊາຊົນຢູ່ບ້ານ, ເມືອງ ໄດ້ຮັບການພັດທະນາດີຂຶ້ນກວ່າເກົ່າ.
ໃນໄລຍະທີ່ໄດ້ເຄື່ອນໄຫວພົບປະຢ້ຽມຢາມບັນດາເມືອງ ໄດ້ເຫັນເຖິງຄວາມສຸກຂອງພໍ່ແມ່ປະຊາ ຊົນ, ເຫັນທັງບັນຫາ ແລະ ໄດ້ຮັບຄວາມອົບອຸ່ນຈາກທຸກໆບ່ອນທີ່ໄດ້ໄປ ແລະ ເຫັນໄດ້ຄວາມສາມັກຄີປອງດອງຂອງປະຊາຊົນເຜົ່າຕ່າງໆ ເຊິ່ງກົງກັບເປົ້າໝາຍທີ່ພວກເຮົາຢາກຊ່ວຍເຫລືອ ເພື່ອຈະເສີມຂະຫຍາຍຄວາມສາມັກຄີປອງດອງຂອງຊົນເຜົ່າ, ຄິດວ່າເຮົາເຫັນແນວທາງແລ້ວພື້ນຖານແມ່ນມາຈາກສາຍເຕັກໂນໂລຊີ ແລະ ເຕັກໂນໂລຊີ ຄວນມາຮັບໃຊ້ກັບຜູ້ທີ່ຢູ່ຊົນນະບົດຫ່າງໄກ, ນີ້ຖືວ່າແມ່ນຜົນສຳ ເລັດຂອງເຕັກໂນໂລຊີ ແລະ ອີກຢ່າງໜຶ່ງ ຂ້າພະເຈົ້າເປັນຕົວແທນພາກທຸລະກິດ ເຮົາຕ້ອງໄດ້ເຮັດໃຫ້ບົດບາດຂອງເຮົາດີທີ່ສຸດ ເພາະພາກທຸລະກິດທີ່ມາເປັນຕົວແທນຂອງປະຊາຊົນບໍ່ມີຫລາຍ ເພາະສະນັ້ນ,ຂ້າພະເຈົ້າໄດ້ຮັບໂອກາດສະໝັກຮັບເລືອກຕັ້ງນີ້ແລ້ວ ຕ້ອງສະແດງສຸດຄວາມສາມາດໃຫ້ປະຊາຊົນໄດ້ເຫັນ ວ່າພາກທຸລະກິດເຮົາກໍ່ເປັນຕົວແທນຂອງປະຊາຊົນທີ່ດີໄດ້, ຮັບໃຊ້ປະຊາຊົນໄດ້ ໂດຍສະເພາະໃນຍຸກໃໝ່ ໃນການແກ້ບັນຫາຄວາມຫຍຸ້ງຍາກຕ່າງໆ ແລະ ຂໍຮຽກຮ້ອງມາຍັງພໍ່ແມ່ປະຊາຊົນ ເພື່ອເຮັດແນວໃດໃຫ້ບັ້ນເລືອກຕັ້ງໄດ້ຮັບຜົນສຳເລັດ ຈົ່ງພາກັນໄປໃຊ້ສິດ ແລະ ສະແດງສິດ ຂອງຕົນໃນວັນທີ 21 ກຸມພາ 2021 ທີ່ຈະມາເຖິງນີ້ ໃຫ້ໄດ້ 300%.
ຂ່າວ: ມະນີວັນ
